Gautegiz Arteagako Hitza

Ibarrangeluko bertso afarira joateko txartelak salgai jarri dituzte

Busturialdeko Hitza — Wed, 22 Feb 2012 14:03:13 +0000

Urtero legez, Ibarrangeluko Kultur Etxeak bertso afaria antolatu du, eta txartelak salgai jarri dituzte dagoeneko. Jakinarazi dutenez, izena emoteko epea otsailaren 25ean zarratuko dute, eta horrenbestez, afarira joateko txartela lehenbailehen erostea gomendatu dute. Eleizalde auzoko kultur etxean, edota Arbolizeko txokoan emon dezakete izena interesatuek.

Afaria Arbolizko txokoan egingo dute martxoaren 3an, eta 21:30ean hasiko dira jaten bertsozaleak. Bapo jan ostean, ohitura den bezala, bertsolariak abesten hasiko dira. Bertsozaleek edarto pasatzeko aukera izango dute, maila handiko bertsolari bigaz gozatzeko aukera izango baitute: Amets Arzallus eta Sustrai Colina.

Kalitatearen Goreneko Ziurtagiria lortu du Egoinek

Gautegiz Arteagako Hitza — Thu, 02 Feb 2012 09:38:06 +0000

Eako Egoin enpresak Zur industrien Ikerkuntzarako Elkarteak eta Kataluniako Eraikuntzaren Teknologia Industriak emoten duten ziurtagiria lortu du. Hain zuzen, bost zigilu eskuratu ditu zurgintzan lan egiten duen enpresa horrek. Enpresako arduradun komertziala den Unai Gorroñok zigilu horiek hartzeak merkatu zabalago baterako ateak irekiko dizkietela esan du, eta pozik agertu da lortutakoagaz. Besteak beste, eraikuntza publikoa egitea ahalbidetu die errekonozimendu barriak, baita 15 solairu arteko eraikuntza handiak egitea be. “Orain arte 3 solairu arteko eraikuntzak egin genitzakeen”.

46 korrikalari II.Herri-Krossean

Gautegiz Arteagako Hitza — Wed, 01 Feb 2012 12:28:35 +0000

Montorre eskolako guraso elkarteak antolatuta, II. Herri Krossa egin zuten domekan, Gautegiz Arteagan. 46 parte hartzaile izan dira aurten, lehenengo herri krossean baino gehiago, eta antolatzaileak pozik agertu dira.

Zapatuan mendi irteera egingo dute Kortezubitarrek

Gautegiz Arteagako Hitza — Tue, 11 Oct 2011 14:21:54 +0000

Kortezubiko Gure Arbasoen Herria Kultur Taldeak mendi irteera antolatu du. Jakinarazi dutenez, Aizkorrira (Gipuzkoa) joango dira zapatuan, eta izena emoteko epea zabalik dago barikura arte. Izena emoteko, Kortezubiko udaletxera, edo 619.799.256 telefono zenbakira deitu behar dute interesatuek.

Autobusa 08:00etan urtengo da Kortezubiko udaletxe ondoko aparkalekutik. Mendizaleak Arantzazuraino (Gipuzkoa) joango dira autobusez, eta ostean, Urbiara igoko dira. Behin Urbiara helduta, gura dutenek Aizkorrira igotzeko aukera izango dute. Umeek bost euro ordaindu behar dituzte, eta helduek hamar euro.

Udalaren aurrekontu proposamena aurkezten dabiltza Ean egunotan

Gautegiz Arteagako Hitza — Tue, 11 Oct 2011 14:20:31 +0000

Eako Udala, udal aurrekontuen poposamena aurkezten dabil herritarren artean. Iragan domekan, Bedaroan lehenengo aurkezpena egin ostean, bihar eta etzi egingo dituzte hurrengo bi batzarrak. Etzi, Natxituko Bolatokian jarri dute hitzordua, eta barikuan, udaletxeko bilera gelan. Bi batzarrak 19:00etan hasiko dira, eta udal gobernuko zenbait kidek parte hartuko dute, tartean herriko alkateak.

Udaletik azaldu dutenez, helburuak jendearen “parte hartzea sustatzea”, eta udalaren “kudeaketa hobetzea” dira. Izan be, mundu guztiak “esateko zerbait” duela iritzita, herria hobetu dezaketela uste dute.

Jakinarazi dutenez, “duela hamabost egun inguru” jarri zuten martxan udal aurrekontuen inguruko eztabaida. Lehenengo batzar horietan, aurrekontu sinple bat zelakoa den azaldu zuten udal arduradunek. Ohiko gastuak zeintzuk diren, eta diru sarreren nondik norakoak azaldu zituzten besteak beste.

Udal aurrekontuen inguruko zalantzak argitu ostean, bestalde, herritarren proposamenak batzeko epea zabaldu zuten, eta udalaren aurrekontu proposamena jendarteratzeko momentua heldu da orain. Halanda be, egunotakoak ez dira izango azkenengo batzarrak. Udal aurrekontua aurkeztu ostean, herritarrek iritzi eta proposamenak aurkezteko aukera izango dute barriro.

Santimamiñe haitzuloaren kudeaketa sarituko dute gaur

Gautegiz Arteagako Hitza — Mon, 03 Oct 2011 10:55:05 +0000

BizkaiKOA Bizkaiko Foru Aldundiaren museoen erakunde kudeatzaileak diploma bat jasoko du gaur, turismoaren kalitatearekin duen konpromisoarengatik eta Santimamiñe haitzuloaren kudeaketan eginiko praktika onengatik. Pilar Zorrilla Eusko Jaurlaritzako Merkataritza eta Turismoko sailburuordearen eskutik jasoko du diploma Asier Madarieta Bizkaiko Foru Aldundiko ordezkari eta BizkaiKOA erakundeko kudeatzaileak.

Balenciaga Museoan egingo den gala batean hartuko du diploma BizkaiKOAk, 18:00etatik aurrera.

Eusko Jaurlaritzak ematen duen sari hori praktika onak sustatzeko programaren barruko ekimenetako bat da; programa horren bidez, turismoko establezimenduen kudeaketa zuzena indartu nahi du, eta sektorearen profesionalizazioa areagotu.

Txomin Aranak Euskadiko txapeldun izateko aukera oso ona du

Gautegiz Arteagako Hitza — Thu, 15 Sep 2011 14:53:07 +0000

Motokros zaleek aukera paregabea izango dute domekan. Izan be, motokros lasterketak lehiatuko dira Ereñoko Gabika auzoan, Gernika Off Road taldeak antolatuta. Domekakoa Euskadiko Txapelketako azkenengo proba puntuagarria izango da, eta ezustekorik gertatzen ez bada, MX-Elite mailako txapela eskualdean geratuko da. Txomin Arana ereñotarrak 169 puntu eskuratu ditu dagoeneko, eta 35 puntura dauka bigarren sailkatua.

Ereñoko lasterketak Euskadiko txapelduna erabakiko du, baina ez da zaleen harreta gune bakarra izango . Izan be, MX-Elite mailan nazioarteko lasterketak lehiatzen dituzten gidari gonbidatuak izango dira zirkuituan ikusleen gozamenerako. MX-Elite mailako lasterketaz gain, ume mailako, beteranoen mailako, eta klasikoen mailako lasterketak jokatuko dira.

Lehenengo lasterketa ume mailako gidariek lehiatuko dute 12:10ean, eta 19:30ak arte motokrosagaz gozatzeko aukera egongo da Gabika auzoan. MX-Elite mailako lasterketaren txandak, bestalde, 16:10ean eta 18:25ean hasiko dira

Ekitaldiaren barruan, Txus Jaio gidari markinarrarren erakustaldia ikusteko aukera izango dute bildutakoek. Jaiok, Car-Cross baten gainean duen abilezia erakutsiko du 15:15ean, 17:00etan eta 19:15ean.

Gidari gonbidatuak (MX-Elite maila). Alvaro Lozano, Adrian Garrido, Ricardo Costas, Joan Cros, Kevin Ballanger, Jaume Betriu, Julien Tournessi, Ander Valentin

Elantxobeko Udalak mugatu egingo du ontzien sarbidea Madalen egunean

Gautegiz Arteagako Hitza — Mon, 11 Jul 2011 07:37:49 +0000

Madalen egun ate joka dagoela eta, ohiko bilera egin zuten Bermeoko, Mundakako, Elantxobeko, Ibarrangeluko udalek, Gurutze Gorriak, Ertzaintzak, Portu Zuzendaritzak, Larrialdi Zerbitzuak, Babes Zibilak eta Itsas Kapitaintzak, segurtasun neurriak ezartze aldera. Elantxoben batutakoek datozen urteetara begira segurtasun araudi espezifiko bat egitearen alde egin zuten, aurtengorako be zenbait neurri ezarriz. Hala, besteak beste, portura sarbidea izango duten ontzien kopurua mugatuko dute hilaren 22an, istripuak saihestekotan.

Jarduera protokoloa ezarri gura du Udalak araudi espezifikoaren bitartez. Horrez gain, balizko istripu larri baten aurrean erantzukizun partekatuaren alde agertu da.
1996an gazte bat portutik jausterakoan tetraplegiko geratu zela gogora ekarriz, horrelakorik errepikatzerik ez dutela gura esan du Elantxobeko alkate Koldo Olagibelek. «Egin dezagun amankomuneko aseguru bat eta erantzukizunak partekatzeko araudi espezifiko bat».

Elantxobeko Udalaren egoera ekonomikoa ez dela ona nabarmendu du Olagibelek eta, horrenbestez, zailtasunak dituela segurtasun neurri espezifikoak ezartzeko eta balizko istripu larriei aurre egiteko.

Aurten, bestalde, portutik kanpo egingo dute makilaren ekitaldi sinbolikoa. Ohiturari jarraituz, portura heltzean emon ohi dio Elantxobeko alkateak aginte makila Bermeokoari, baina aurten ez da portua izango horren lekuko. Idurre Bidegurenek, hortaz, portutik kanpo hartuko du makila Koldo Olagibelen eskuetatik.
Segurtasun neurriak
Bestalde, aurten be ibilgailuen sarbidea mugatuko du Ertzaintzak. Zehazki, Ibarrangelun egongo dira ertzainak kreditaziorik ez dutenei sarbidea mugatzen, BI-2237 eta BI-3238 errepideak batzen diren lekuan. Hartara, larrialdi zerbitzuek behar izanez gero sarbidea libre egongo dela diote Elantxobeko Udaletik.

Itsasoan be hartuko dituzte neurriak, hainbat baitira Elantxobera itsasontziz ailegatzen direnak. Hala, Gurutze Gorriaren lau ontzi ariko dira beharrean. DYAk, bestalde, lau anbulantzia izango ditu Elantxoben eta SOS Deiak-ek unitate mugikor bat eroango du kostako herrira, balizko larrialdiak koordinatzeko. Arbolizen, bestetik, heliportua kokatuko dute.

Elantxobeko Udalak jakinarazi duenez, bestalde, ez da txosnarik jarriko Madalen egunean.

Traineru barria bedeinkatu dute Elantxobekoek

Busturialdeko Hitza — Mon, 04 Jul 2011 14:03:40 +0000

Liga hasita egon arren, Elantxobeko arraun taldeak iragan zapatuan aurkeztu zuen denboraldi barriko trainerua. Aurkezpena Elantxobeko portuan egin zuten herritarren begiradapean. Lehenengo, Patxi Egurrola taldeko presidenteak egin zuen berba eta ostean, herriko abadeak trainerua bedeinkatu zuen. Amaitzeko, Elantxobeko Arraun Elkarteko bi umek aurreskua dantzatu zuten, eta denboraldi barriko argazkia atera zuten taldekide guztiek.

Elantxobeko arraun taldeak garaipenaren olatuan jarraitu gura du asteburuan

Gautegiz Arteagako Hitza — Thu, 23 Jun 2011 14:12:32 +0000

Elantxobeko arraun taldeak garaipenaren olatuan jarraitu gura du asteburuan. Zapatuan, Sestaoko estropada lehiatuko dute, eta domekan, barriz, etxeko estropada lehiatuko dute zaleen babesean. Bi estropadak 12:00etan hasiko dira eta Elantxobeko arraunlariekin batera, Mundakako arraunlariak be, irteera lerroan izango dira.

Patxi Egurrola Busturialdeako presidenteak azaldu duenez, «arraunlariak gogotsu daude eta aurreko postuetan ibiltzea espero dugu». Dioenez, etxeko estropada irabaztea «ederra» litzateke, baina «uretan» erakutsi behar dute indartsuenak direla.

Hala, domekako estropadan zaleen babesa izatea «onuragarria» izango da presidentearen ustez. Denboraldiko lehenengo proba irabazi ostean, herritarrak eta arraunlariak domekako estropada heltzeko gogotsu daude. Iaz taldea mailaz bajatu ondoren, herritarrak «ilusioz gainezka» daude eta poztasun momentuak emoten jarraitu gura dute taldekideek. «Sasoiko gaudela, eta lehenengo garaipena kasualitatea baino gehiago izan dela erakutsi gura dugu» dio Egurrolak.

Mundakako arraun taldea, bestalde, erritmoa hartzen jarraitzeko asmoagaz doa asteburuko estropadetara. Javi Olazar presidenetaren hitzetan, «gutxi urten gara traineruagaz itsasora, eta hobetzeko tartea handia dugu oraindik». Ohorezko txanda urrun ikusten duten arren, bigarren txandan egonkortu gura dute taldekideak.

Zapatuan Sestaon

Zapatuan, bestalde, Sestaoko uretan lehiatuko dute estropada bertoko bitaldeek. Bilboko ibaian kalea eta korrontea oso garrantzitsuak dira garaipenaren lehian egoteko. Egurrolaren hitzetan, “errekan egin beharreko estropadak ezberdinak dira”, eta gainera, “lehenengoz” egingo dute arraunean errekan traineru barriagaz.