Gautegiz Arteagako Hitza » Nabarniz

Txomin Aranak Euskadiko txapeldun izateko aukera oso ona du

Gautegiz Arteagako Hitza — Thu, 15 Sep 2011 14:53:07 +0000

Motokros zaleek aukera paregabea izango dute domekan. Izan be, motokros lasterketak lehiatuko dira Ereñoko Gabika auzoan, Gernika Off Road taldeak antolatuta. Domekakoa Euskadiko Txapelketako azkenengo proba puntuagarria izango da, eta ezustekorik gertatzen ez bada, MX-Elite mailako txapela eskualdean geratuko da. Txomin Arana ereñotarrak 169 puntu eskuratu ditu dagoeneko, eta 35 puntura dauka bigarren sailkatua.

Ereñoko lasterketak Euskadiko txapelduna erabakiko du, baina ez da zaleen harreta gune bakarra izango . Izan be, MX-Elite mailan nazioarteko lasterketak lehiatzen dituzten gidari gonbidatuak izango dira zirkuituan ikusleen gozamenerako. MX-Elite mailako lasterketaz gain, ume mailako, beteranoen mailako, eta klasikoen mailako lasterketak jokatuko dira.

Lehenengo lasterketa ume mailako gidariek lehiatuko dute 12:10ean, eta 19:30ak arte motokrosagaz gozatzeko aukera egongo da Gabika auzoan. MX-Elite mailako lasterketaren txandak, bestalde, 16:10ean eta 18:25ean hasiko dira

Ekitaldiaren barruan, Txus Jaio gidari markinarrarren erakustaldia ikusteko aukera izango dute bildutakoek. Jaiok, Car-Cross baten gainean duen abilezia erakutsiko du 15:15ean, 17:00etan eta 19:15ean.

Gidari gonbidatuak (MX-Elite maila). Alvaro Lozano, Adrian Garrido, Ricardo Costas, Joan Cros, Kevin Ballanger, Jaume Betriu, Julien Tournessi, Ander Valentin

Hautetsi guztien aldeko botoekin izendatu dute Lorena Zubizarreta alkate

Gautegiz Arteagako Hitza — Sat, 11 Jun 2011 10:48:40 +0000

Goizean goiz egin dute Nabarnizen kargu hartze ekitaldia. 10:00etan zuten hitzordua, eta ordu hori pixka bat gaindituta eratu dute adineko mahaia. Behin hori eginda, bozketari ekin diote, hautetsi guztiek –EAJkoak barne– emonaz Lorena Zubizarretaren aldeko botoa. Hartara, dagoeneko Bilduko kidea da Nabarnizko alkate. Aginte makilaren faltan, udaletxeko giltzak emon dizkio Lourdes Aboitizek Zubizarretari.

103 boto lortu zituen Bilduk udal hauteskundeetan, eta 68 EAJk. Horrenbestez, lau zinegotzi lortu zituen koalizioak, eta bakarra jeltzaleek.

Ikastaroan izena emateko azken eguna barikua izango da

Gautegiz Arteagako Hitza — Tue, 15 Mar 2011 12:51:58 +0000

Nabarnizko Udalak herritarrentzako ikastaroa antolatu du. Ikastaroan parte-hartzen dutenek, eguneroko objektuak apainduko dituzte lore sikuekin. Izena emoteko azkenengo eguna, barikua izango da. Interesatuek udaletxera gerturatu behar dute edo 94-625 50 77 telefono zenbakira deitu behar dute. Ikastaroa hamabi ordukoa izango da eta Gizarte Lokalean emongo dituzte klaseak. Hilaren 25ean hasiko da ikastaroa.

Domekan, Gizon proben Euskadiko eta Bizkaiko txapelketak lehiatuko dituzte Nabarnizen

Gautegiz Arteagako Hitza — Thu, 25 Nov 2010 12:56:24 +0000

Domeka honetan, herri kirol zaleek aukera paregabea izango dute Nabarnizen. Hain zuzen, gizon proben Euskadiko eta Bizkaiko txapelketak lehiatuko dituzte sei gizonek herriko probalekuan. Bertan, Mikel Alzola gernikarra eta Karlos Hormaetxea busturiarra izango dira txapelengatik borrokatzen.

Txapelketa, 12:30ean hasiko da eta lehenengo txanda horretan Hormaetxea busturiarra izango da harriari tiraka. 17:00etan, aldiz, bigarren txanda hasiko da eta Alzola bertan izango da.

Hamaikagarrena nahi du

Alzolak, hamar aldiz irabazi ditu Euskadiko eta Bizkaiko txapelketak. Domekan, hortaz, taxpelketa biak hamaikagarren aldiz irabazteko ahalegina egingo du.

Probalari guztiak

Mikel Alzola (Gernika-Lumo)
Karlos Hormaetxea (Busturia)
Karmelo Ibarluzea Satxibar (Etxebarria)
Fernando Zarrabe (Etxebarria)
J. Carlos Lopez (Araba)
Oscar Perez (Barakaldo)