Gautegiz Arteagako Hitza » Ibarrangelu

Ibarrangeluko bertso afarira joateko txartelak salgai jarri dituzte

Busturialdeko Hitza — Wed, 22 Feb 2012 14:03:13 +0000

Urtero legez, Ibarrangeluko Kultur Etxeak bertso afaria antolatu du, eta txartelak salgai jarri dituzte dagoeneko. Jakinarazi dutenez, izena emoteko epea otsailaren 25ean zarratuko dute, eta horrenbestez, afarira joateko txartela lehenbailehen erostea gomendatu dute. Eleizalde auzoko kultur etxean, edota Arbolizeko txokoan emon dezakete izena interesatuek.

Afaria Arbolizko txokoan egingo dute martxoaren 3an, eta 21:30ean hasiko dira jaten bertsozaleak. Bapo jan ostean, ohitura den bezala, bertsolariak abesten hasiko dira. Bertsozaleek edarto pasatzeko aukera izango dute, maila handiko bertsolari bigaz gozatzeko aukera izango baitute: Amets Arzallus eta Sustrai Colina.

Sixtoren euskal kapera ezagutarazi guran

Gautegiz Arteagako Hitza — Tue, 30 Nov 2010 12:44:13 +0000

Ibarrangeluko San Andres eliza Bizkaiko Ondare Historiko izendatu zuten 2006. urtean. Elizaren berezitasuna eraikinaren egurrezko ganga landua da, Euskal Herrian material horrekin egindako ganga bakarrenetarikoa dena. Antzina, Euskal Herriko itsasgizonek merkatal harremanak zituzten Herbereekin eta, harrizko ganga egitea garestiegia zenez eta Herbereetan ohikoak zirela eta, egurrezko ganga egitea pentsatu zuten. Gianluigi Colalucci Vatikanoko Sixtoren kapera zaharberritu zuen adituaren ustetan, “euskal arteak duen Sixtoren kapera da Ibarrangelukoa”.

Aurten, Bizkaiko Foru Aldundiak antolatutako Ondarearen Europako jardunaldien baitan, bisita gidatua izan zen urriaren 23an San Andres elizara. Bisitak, gainera, “arrakasta” izan zuen, Jesus Mari Ziluaga Ibarrangeluko alkateak azaldu duenez. 200 pertsona inguru batu ziren Alberto Santana Bizkaiko Foru Aldundiko Ondare Historikoaren arduradunak elizari buruz eman zituen azalpenak entzuteko.

Hala, herrian duten “altxorra ezagutarazten jarraitu gura” dutela esan du Ziluagak. Ildo horretatik, urtean zehar be bisita gidatuak antolatu gura dituzte. Izan be, era horretako altxorra izateak herriaren “prestigioa handitzeko” balio duela eta Ibarrangelu “mapa kulturalean kokatzeko” aukera emango lukeela nabarmendu du Ziluagak.

Aldundiko Kultura arloko arduradunekin “oraindik berba egin behar” dutela zehaztu du alkateak, urriko bisita gidatuaren ostean “aldeko jarrera” erakutsi zutela gaineratuz. Ziluagaren esanetan, “Aldundiak laguntzerik ez badu, altxor hau ezagutarazteko zerbait pentsatu beharko dugu Udal mailan”.

Bihar hasiko da Urdaibaiko lehenengo eskupilota txapelketa Ibarrangelun

Gautegiz Arteagako Hitza — Thu, 25 Nov 2010 12:20:59 +0000

Urremendi Landa Garapenerako Elkarteak antolatuta, bihar, Urdaibaiko lehenengo eskupilota txapelketari hasiera emango diote Ibarrangelun. Txapelketa, 18:30ean hasiko da eta norgehiagoka bi izango dira lehenengo jardunaldi horretan.

Herrien arteko txapelketan parte-hartzen duten taldeek, benjamin mailan, alebin mailan eta infantil mailan lehiatuko dituzte partidak. Ildo horretatik, hiru partidatik bi irabazten dituzten taldeek, txapelketan aurrera egitea lortuko dute.

Antolatzaileek jakinarazi dutenez, “Arabako, Bizkaiako, Errioxako (Espainia), Gipuzkoako eta Nafarroako 24 taldek lehiatuko dute Urdaibaiko txapelketa”. Partida guztiak, Busturialdeako eta Lea Ibarrako frontoietan jokatuko dituzte.

Finalera iristen diren taldeek, Morgako frontoian ikusiko dute elkar urtarrilaren bukaeran edo otsailean. Finalaren egunean, gainera, lau terdiko profesionalen pilota partida izango da.

Barikuko partidak Ibarrangelun

Barikuko lehenengo partida bietan, Gautegiz Arteagako Montorre taldeko pilotariak izango dira hurrengo kanporaketan izateko txartelarengatik borrokatuko direnak.

Montorre A-Iurreta
Montorre B-Lea Ibarra

Udala herritarrengana hurbiltzea helburu duen webgunea sortu dute

Gautegiz Arteagako Hitza — Mon, 15 Nov 2010 10:15:14 +0000

Ibarrangeluko Udalak teknologia barrietarako jauzia egin du, www.ibarrangelu.net webgunea erabilgarri jarrita. Barikuan egin zuten atariaren jendaurreko aurkezpena eta, han azaldu zutenez, orain arte zentzu horretan egondako gabezia gainditzea du Udalak helburu.

“Herriko taldeak batzeko”, informazioa zabaltzeko, ekitaldien berri emateko… sortu du tokiko erakundeak webgunea. Horrez gain, herritarren eta Udalaren arteko hartu-emonak erraztu gura ditu Udalak, herritarrengana hurbilduz erakundea.

Webguneak hainbat atal ditu. Besteak beste, herriko taldeen informazioa eta agendaren, ikastaroen… berri ematen du. Halaber, osoko bilkuren aktak eta bandoak jasotzen ditu.

Ormaiztegira irteera egingo dute Hirugarren Adinekoen Elkartekoek

Gautegiz Arteagako Hitza — Fri, 05 Nov 2010 15:36:50 +0000

Ibarrangeluko Hirugarren Adinekoen Elkartekoek irteera kulturala egingo dute azaroaren 24an. Ormaiztegira (Gipuzkoa) joango dira eta joateko interesa duten guztiek elkarteak BBKn duen kontu korrontean 25 euro sartu beharko dituzte, azaroaren 17a baino lehen.
Azaroaren 24an 08:30ean batuko dira, Eleizaldeko aparkalekuan, handik ekiteko bidaiari. 10:30ak aldera Ormaiztegira iritsiko dira eta bertan hamaiketakoa egingo dute.
Ostean, 11:30ean, bisita kulturala egingo dute Zumalakarregi museora eta Ormaiztegiko trenzubira. Bisita eta gero, 13:30ak aldera, Zumarragarantz abiatuko dira, bertan dagoen Balestika jatetxean bazkaltzeko. Bazkaria 14:30erako aurreikusi dute. 17:00etan Zumarragatik Bergararantz irtengo dira, han ordu biko bisita askea egiteko.
19:30ean bueltatuko dira herrirantz eta, aurreikusten dutenez, 21:00ak aldera helduko dira bertora.