Gautegiz Arteagako Hitza » Ereño

Omenaldia egingo diote Ereñoko antzinako maisuari

Gautegiz Arteagako Hitza — Wed, 04 May 2011 13:34:07 +0000

Ereñoko herritarrek omenaldia egingo diote, Don Rafael Sosa Ruiz antzinako maisu kanariarrari. Maisu ohia Ereño bisitatzen izango da bere familiagaz eta ereñotarrek omenaldi xume bat egiteko baliatu gura dute egonaldia. Azaldu dutenez, hilaren 21ean ikasle ohiak eta maisuaren lagunak argazkia aterako dute kanariarragaz. Argazkia antzinako eskoletan aterako dute eta hitzordua 14:00etan jarri dute.

Argazkia atera ostean, bazkaria izango da Arita Berri jatetxean. Izena emoteko epea, hilaren 14a arte izango da zabalik eta modu bi izango dira. Alde batetik Ereñozar tabernan, Atxoste tabernan edota Arita Berri jatetxean apuntatu daiteke.Bigarren aukera, amantalgorri@gmail.com posta elektronikora idaztea da.

Jakinarazi dutenez, izena emoterakoan «20 euro» jarri behar dira. Bildutako dirua, maisu ohiari «opari bat erosteko» erabiliko dute.

Alkatearen dieten auzian Udalak jarritako helegitearen aurkako epaia emon du Auzitegiak

Busturialdeko Hitza — Mon, 04 Apr 2011 11:02:21 +0000

Bizkaiko Probintzia Auzitegiak ez ditu onartu dieten auziari Ereñoko Udalak jarritako apelazio-helegitean emondako arrazoiak. Komunikabide bat auzitara eroan zuen Udalak Juan JoseArribalzaga alkateak osoko bilkura bakoitzeko dieta legez 944,09 euro jasotzen zituela kaleratu zuelako.
Lehenengo epaiak komunikabidearien alde egin zuen, eta apelazio-helegitea aurkeztu zuen orduan Ereñoko Udalak. Baina helegite hori aztertu eta barriro komunikabidearen aldeko epaia emon du Bizkaiko Probintzia Auzitegiak

Hamargarren urteurrena ospatuko ditu bihar Ereñon Gernika Off-Roadek

Gautegiz Arteagako Hitza — Fri, 26 Nov 2010 08:06:39 +0000

Gernika Off-Road elkarteak hamar urte daramatza motokrosaren munduan lan egiten. Urteurren borobil hori ospatu gura izan dute elkarteko kideek eta, hain zuzen, bihar jarri dute hitzordua, Ereñon, Arita Berri jatetxearen inguruetan. Motokrosa gustuko dutenek aukera paregabea izango dute, beraz, biharkoan, izango da-eta kirol horretaz gozatzeko aukera.

Goizean goiz hasiko dira ospakizuneko ekitaldiak, 08:30ean jarri baitute hitzordua irteera egiteko. Maila guztietako lagunek parte har dezaketela esan dute, gainera. 09:00etan, bestalde, umeentzako kronoa izango da Ereñon.

Ordubetera antzinako motoen erakusketa ikusteko aukera egongo da, eta 12:30ean enduroko entrenamenduak egingo dituzte. Tartean, hala ere, hamaiketakorako aukera ere izango da. 14:00etan Xtreme entrenamendua izango da eta 15:30ean bazkaria. Bazkalostean ez da girorik faltako, bideoak, musika, jaia… izango baitira Ereñon. 21:30erako kaltzontzilo lasterketa dago aurreikusita.