Jarduera protokoloa ezarri gura du Udalak araudi espezifikoaren bitartez. Horrez gain, balizko istripu larri baten aurrean erantzukizun partekatuaren alde agertu da.
1996an gazte bat portutik jausterakoan tetraplegiko geratu zela gogora ekarriz, horrelakorik errepikatzerik ez dutela gura esan du Elantxobeko alkate Koldo Olagibelek. «Egin dezagun amankomuneko aseguru bat eta erantzukizunak partekatzeko araudi espezifiko bat».

Elantxobeko Udalaren egoera ekonomikoa ez dela ona nabarmendu du Olagibelek eta, horrenbestez, zailtasunak dituela segurtasun neurri espezifikoak ezartzeko eta balizko istripu larriei aurre egiteko.

Aurten, bestalde, portutik kanpo egingo dute makilaren ekitaldi sinbolikoa. Ohiturari jarraituz, portura heltzean emon ohi dio Elantxobeko alkateak aginte makila Bermeokoari, baina aurten ez da portua izango horren lekuko. Idurre Bidegurenek, hortaz, portutik kanpo hartuko du makila Koldo Olagibelen eskuetatik.
Segurtasun neurriak
Bestalde, aurten be ibilgailuen sarbidea mugatuko du Ertzaintzak. Zehazki, Ibarrangelun egongo dira ertzainak kreditaziorik ez dutenei sarbidea mugatzen, BI-2237 eta BI-3238 errepideak batzen diren lekuan. Hartara, larrialdi zerbitzuek behar izanez gero sarbidea libre egongo dela diote Elantxobeko Udaletik.

Itsasoan be hartuko dituzte neurriak, hainbat baitira Elantxobera itsasontziz ailegatzen direnak. Hala, Gurutze Gorriaren lau ontzi ariko dira beharrean. DYAk, bestalde, lau anbulantzia izango ditu Elantxoben eta SOS Deiak-ek unitate mugikor bat eroango du kostako herrira, balizko larrialdiak koordinatzeko. Arbolizen, bestetik, heliportua kokatuko dute.

Elantxobeko Udalak jakinarazi duenez, bestalde, ez da txosnarik jarriko Madalen egunean.

Patxi Egurrola Busturialdeako presidenteak azaldu duenez, «arraunlariak gogotsu daude eta aurreko postuetan ibiltzea espero dugu». Dioenez, etxeko estropada irabaztea «ederra» litzateke, baina «uretan» erakutsi behar dute indartsuenak direla.

Hala, domekako estropadan zaleen babesa izatea «onuragarria» izango da presidentearen ustez. Denboraldiko lehenengo proba irabazi ostean, herritarrak eta arraunlariak domekako estropada heltzeko gogotsu daude. Iaz taldea mailaz bajatu ondoren, herritarrak «ilusioz gainezka» daude eta poztasun momentuak emoten jarraitu gura dute taldekideek. «Sasoiko gaudela, eta lehenengo garaipena kasualitatea baino gehiago izan dela erakutsi gura dugu» dio Egurrolak.

Mundakako arraun taldea, bestalde, erritmoa hartzen jarraitzeko asmoagaz doa asteburuko estropadetara. Javi Olazar presidenetaren hitzetan, «gutxi urten gara traineruagaz itsasora, eta hobetzeko tartea handia dugu oraindik». Ohorezko txanda urrun ikusten duten arren, bigarren txandan egonkortu gura dute taldekideak.

Zapatuan Sestaon

Zapatuan, bestalde, Sestaoko uretan lehiatuko dute estropada bertoko bitaldeek. Bilboko ibaian kalea eta korrontea oso garrantzitsuak dira garaipenaren lehian egoteko. Egurrolaren hitzetan, “errekan egin beharreko estropadak ezberdinak dira”, eta gainera, “lehenengoz” egingo dute arraunean errekan traineru barriagaz.

Boto bakarreko aldea izan zuten EAJk eta Bilduk udal hauteskundeetan, eta boto horrek erabaki du alkatetza. 153 botogaz, lau hautetsi lortu zituen Bilduk, eta hiru jeltzaleek, 152 botogaz. Bi anaia ziren zerrendaburuak.

Ekitaldia amaitu orduko, datozen lau urteetan herritarren parte-hartzea bermatu gura dutela azaldu dute Bilduko kideek.

Aurtengo trainerilla denboraldiko bosgarren eta seigarren estropadak jokatuko dira asteburuan, Elantxoben. Beste askoren artean, eskualdeko arraunlariak izango dira bertan. Estropada horiekin agurtuko dute trainerilla denboraldia arraunlariek. Hainbat urtetan galduta egon den ohitura berreskuratzea lortu zuten iaz Elantxobekoek; izan be,  trainerilla estropadak jokatu ziren iaz, hainbat urteren ondoren. Ohitura hori mantenduz, aurten be trainerilla estropadez gozatzeko aukera izango da Elantxoben. Iaz eguraldi «kaskarra» izan zutela eta ia estropada «atzeratu» egin behar izan zutela aipatu du Elantxobe Arraun Elkarteko presidente Patxi Egurrolak. Aurten, ostera, denbora lagun izatea espero dute antolatzaileek. Bihar, 16:00etan hasiko dute trainerillek norgehiagoka eta etzi, ostera, 11:00etan. Egun bi horietan eskualdeko arraunlariek be parte hartuko dute; hala nola, Bermeoko, Mundakako, Elantxobeko, Lekeitioko zein Ondarruko arraunlariak izango dira bertan. Egurrolak aipatu duenez, portua «itxita» egongo da autoentzat, estropadak direla eta. Asteburuko estropada bi horiekin agurtuko dute aurtengo trainerilla denboraldia arraunlariek; izan be, datorren asteburuan, Bizkaiko trainerilla txapelketarako sailkapena eta finala jokatuko dituzte.

Bizkaiko Foru Aldundiko teknikariak, goizean izan dira Elantxoben, eta bidezko azterketak egin ostean, “errail bat irekitzea” erabaki dute Udaletxean argitu duten bezala. “Semaforo bidez” kontrolatuko dute ireki duten erraila. Gaineratu bezala, “Espainiako Gobernuko Ingurumen ministerioko Kosta Mugapearekin bilduta izan da herriko zinegotzi bat”, baina oraindik ez dago eztabaidatutakoaren berririk.

Teknikariek azaldu duten bezala, “olatuek errepidearen behekaldean dagoen lurra kendu dute, eta horren ondorioz, errepidea erori egin da”.

Behin betiko irtenbidea

Atzokoa, ez da izan errepidea erortzen den lehenengo aldia eta Udalak behin-betiko irtenbidea eskatuko die inplikatutako erakundeei.

Elantxobeko Udaletik ohar bidez jakinarazi duten bezala, “Amaia Eiguren alkatesa, Kosta Mugapearekin bildu zen bere garaian eta olatuei eusteko dagoen horma,aterpetxera arte luzatzea eskatu zuen arazo gehiago ez izateko. Hala ere, orandik ez da inolako obrarik egin”.

Presidentearen hitzetan, «urak, trainerua uretara jeisteko dagoen aldapatik gora egiten du eta ondoren atea kolpatzen du bortizki». Dioenez, Elantxobeko «portua berriztu dutenetik» hirutan sartu da ura taldearen egoitzara. Hiru aldi horietan, egoitzako atea apurtu du itsasoaren indarrak, eta bitan trainerua zulatu du.

“Kolpe gogorra izan da”
Egurrolak azaldu duenez, «guretzat kolpe oso gogorra izan da». Denboraldi berria oraintxe hasi da eta ilusioz ekin nahi zioten urte berriari. Entrenatzaile berria, taldearen egitura berria… estreinatu behar zituzten baina denboraleak kezkati utzi ditu taldekideak. Taldeak zuen traineru bakarrak, zulo bat dauka orain.

Momentu honetan gainera, trainerua ateratzeko atea ezin dute ireki eta «hankaz gora» dute materiala gordetzeko gela. Egurrolak jakinarazi bezala, «herenegun arratsaldeko itsasgorarekin kalte gehiago ez izateko soldatu egin zuten atea». Izan ere, goizaldeko lehenengo itsasgorak hautsi zen. Presidenteak dioenez, «07:00etan iritsi nintzen eta atea apurtuta zegoen».

Ezin gastuei aurre egin

Egurrolaren esanetan, «taldeak ezin die gastu ekonomiko hauei aurre egin. Trainerua konpontzea lehendabizikoa da, baina ondatutako beste materiala ere konpondu beharko dugu». Dirurik ez dutela argudiatzen du, eta orain hiru urte bezala «Aldundiaren laguntza» izatea espero dute.