2012/03/03
Urtero legez, Ibarrangeluko Kultur Etxeak bertso afaria antolatu du, eta txartelak salgai jarri dituzte dagoeneko. Jakinarazi dutenez, izena emoteko epea otsailaren 25ean zarratuko dute, eta horrenbestez, afarira joateko txartela lehenbailehen erostea gomendatu dute. Eleizalde auzoko kultur etxean, edota Arbolizeko txokoan emon dezakete izena interesatuek.
Afaria Arbolizko txokoan egingo dute martxoaren 3an, eta 21:30ean hasiko dira jaten bertsozaleak. Bapo jan ostean, ohitura den bezala, bertsolariak abesten hasiko dira. Bertsozaleek edarto pasatzeko aukera izango dute, maila handiko bertsolari bigaz gozatzeko aukera izango baitute: Amets Arzallus eta Sustrai Colina.
2011/06/04
Herritarrek herritarrentzako egindakoa. Horrelakoa da lehenengoz duela hamar urte egindako Natxituko Txakolin eguna, Angelutxun mahasti txiki bat dela-eta «jendea batzea eta domeka eguerdi alai bat antolatzea» bururatu baitzitzaien orduko hartan Natxituko jai batzordeko kideei. Aurten, ordea, barritasunak dakartza Txakolin egunak, domekan ez ezik zapatuan be izango baita jarduerarik.
Zehazki, txakolin dastaketa antolatu dute egun horretarako. 12:00etan batuko dira, Bodegoian. Taberna horretan bertan emon behar izango da izena, 3 euro ordainduta.
Domekan, ostera, Natxituko Bolatokian elkartuko dira, Jabier Zillonis txakolingileak ekoiztutakoa bakailaoagaz batera dastatzeko. Gainera, 12:15ean Elantxobeko trikitilariak ariko dira giroa alaitzen. Ostean, 13:00etan, Onintza Enbeita eta Gorka Lazkano bertsotan ariko dira.
2011/06/03
Juan Crisostomo Arriaga musika kontserbatorioko kideen kontzertua izango da barikuan Ean, Herrijeri Emon Arnasa kultur taldeak antolatuta. Zenbait film izango dira kontzertuaren ardatza. Hala, Maite Aurrekoetxearen zuzendaritzapean, Forrest Gump, Gladiator, Goldfinger eta Mision Imposible filmen musika izango da entzungai, besteak beste.
San Juan elizan izango da kontzertua, 18:30ean.
2010/12/11
Eako Udalak gabon kantak abesten dituzten Bizkaiko taldeen arteko topaketa antolatu du. Topaketaren helburua, Bizkaiko taldeen “esperientziak ezagutzea” eta herriko taldearen “esperientziak ezagutaraztea” dira.
Eako Anbenduko neska-mutilak taldeaz gain, Gernika-Lumoko, Muxikako, Lekeitioko eta Iurretako taldeak izango dira topaketan. Ohar bidez jakinarazi dutenez, gabon kanten herri “ohitura mantentzen duten” talde horien kontzertua izango da Santa Marai de Jesus Elizan bihar. Kontzertua, 19:30ean hasiko da.
Eako herritarrak, gabon kantak abesteko ohitura mantentzen duten bakarretakoak dira. Anbenduaren 15etik 23ra, herriko neska-mutilak Eako kaleak zeharkatzen dituzte gabon kantak abesten dituzten bitartean.
2010/12/03
Gautegiz Arteagako Hits musika taldea, Banden Lehia txapelketako finalean dago. Arteagatarrak, epaimahaiak aukeratuta iritsi dira finalera eta bihar lehenengo saria etxera eramateko ahalegina egingo dute Bilboko Kafe Antzokiko taula gainean, 21:30tik aurrera. Hits taldeaz gain, finalean beste hiru talde izango dira eta bakoitzak 20 minutu izango ditu bere zuzenekoa aurkezteko.
Asier Aldekogarai Hits taldeko bateriajoleak azaldu bezala, «pozik gaude epaimahaiak aukeratuta iritsi garelako finalera, baina ez dugu irabazteko esperantza handiegirik». Dioenez, «nahi gabe» aurkeztu ziren lehiaketara eta «ondo pasatzeko» asmoarekin doaz Bilboko Kafe Antzokira. Bertan jotzeko aukerak gutxi direla argudiatzen du eta aukera hori aprobetxatu nahi dute.
2010/11/13
Artie dantza taldeak XXIV. Busturialdeko dantzari nagusien eguna antolatu du azaroaren 13rako. Gautegiz Arteagan ospatuko dute egun hori.
19:00etan hasiko da ekitaldia, herriko frontoian. Dantza ugari eta askotarikoak ikusteko aukera paregabea izango da egun horretan Gautegiz Arteagan. Dantza asko, eta baita hainbat dantza talde ere.
Eskualdeko herrietatik iritsiko dira dantzariak Gautegiz Arteagara. Nola ez, herrikoak bertako Artiekoak ere dantzan ikusteko aukera izango da. Bestetik, ohi legez, eskualdekoa izan ez arren Bakioko neska-mutilek ere parte hartuko dute Busturialdeko dantzarien egunean; hain zuzen, Itxas Alde dantza taldea gerturatuko da Arteagara. Bermeoko Alkartasuna, Mundakako Gazte Zar, Busturiko Irrintzi Alai, Foruko Urdaibai eta Gernika-Lumoko Elai Alai dantza taldeak izango dira gainontzeko taldeak.
Afaria eta erromeria
Dantzak amaitu ostean afaria egongo da. Afarira joan nahi duenak Aretxederreta kultur etxean. Ostean, dantz gehiagorako aukera izango dute erromerian.
Busturialdeko Hitza
Gautegiz Arteagako Hitza
Endika Urlezaga Carranza
Oihana Cabello